Framkvæmdir að hefjast

Rikki var í sambandi við Árna, verktakann, í morgun. Hann er búinn að koma píparanum í gang að koma ofnunum upp. Rikki ætlar að hitta þá á morgun til að koma á hreint hvar við viljum hafa ofna. Svo förum við til Montreal og verðum að salta meiri aðgerðir hjá okkur fram yfir helgi.

Myndir

Nýtt að gerast

Jæja, þá erum við komin vel á veg með annað hús. Lóðinni að Döllugötu var skilað í vor og við tóku sumarfrí og pælingar. Eftir sumarfrí fórum við aftur á fullt að leita okkur að húsi og fundum þetta líka fína raðhús á Völlunum. Það er á Klukkuvöllum 44 og er um 220 fm að stærð (með bílskúr). Það eru 4 svefnherbergi, baðherbergi, þvottahús og sjónvarpshol á efri hæðinni en á neðri er bílskúrinn, eldhús, stofa, gestaklósett og forstofa. Við erum mjög ánægð með skipulagið, sérstaklega stærðina á barnaherbergjunum, þau eru frá 11,1 fm uppí rúmlega 13 fm. Eini ókosturinn er að það er ekki innangengt milli bílskúrs og íbúðar. En við lifum það nú af.
Tilboði sem við gerðum í húsið var tekið, öll lán eru komin í gegn, en nú á bara eftir að skrifa undir kaupsamning. Nú erum við bara á fullu að undirbúa okkur við að hefja framkvæmdir. Ójá, húsið skilast rúmlega fokhelt. Það er einingahús, svo að allir útveggir eru einangraðir, allar tengingar eru komnar inn í hús, þ.e. rafmagn, vatn oþh. Ofnar verða uppsettir og hiti kominn inn og gólf verða flotuð og tilbúin undir gólfefni. Að utan er húsið alveg tilbúið með salla, að aftan er lóð grófjöfnuð en að framan er búið að helluleggja bílastæði með hitalögn (ótengd) og smá grasflöt og sorptunnuskýli komið.
Það fyrsta sem liggur fyrir okkur er að einangra loftið á efri hæð. Svo að sandspartla útveggi. Setja upp inni veggi og spartla og svo innréttingar, tæki, hurðir og gólf. Allt þetta þurfum við að klára á 3 mánuðum, ja eða meira að segja innan við það. Því við þurfum að afhenda okkar íbúð 15. desember!
Ég ætla að ná í myndir af Moggavef og pósta hér inn. Svo þarf ég nú að taka myndir sjálf að innan til að sýna hvernig þetta gengur hjá okkur.
Kveðja að sinni.

Úff, draumurinn búinn

Jæja, eftir mikla útreikninga sáum við hjónin fram á að þetta ævintýri yrði um helmingi dýrara en við höfðum gert ráð fyrir í upphafi og gerðum því eins og það sem er í tísku þessa dagana; skiluðum lóðinni. Þessi áætlaði 40 milljón króna draumur var kominn upp í og jafnvel yfir 60 milljónir og var því ekki lengur eins skemmtilegur, í raun orðinn að góðri byrjun á martröð. Þar sem okkur finnast martraðir leiðinlega hræðilegar, ákváðum við að vakna sem fyrst og reyna við annan draum. Nú er stefnan tekin á að finna hús sem hentar fjölskyldunni vel án þess að skerða önnur lífsgæði í leiðinni. Mest erum við að skoða (rað)hús í byggingu á Völlunum og þó það hverfi hafi oft fengið neikvæða umfjöllun hjá fólki, erum við sátt við að halda okkur í Hafnarfirðinum. Ætli ég sé ekki orðin meiri Gaflari en ég vil viðurkenna?!?!

Öll mæliblöð komin

Við erum búin að fá í hendur öll mæliblöð, þ.e. mæli- og hæðarblöð. Ég er búin að senda á arkitektinn og svo er bara að bíða eftir viðbrögðum frá honum. Hann sagðist geta byrjað uppúr miðjum mánuði, ég vona að það dragist ekki mikið.

Hittum arkitektinn

Nú erum við búin að hitta arkitektinn í fyrsta sinn. Hann kom hingað og hitti okkur mömmu. Ég sýndi honum hugmyndirnar sem ég hafði og punkta sem ég var búin að skrifa niður. Hann tók þetta allt og svo þarf ég að senda honum mæli- og hæðarblöð. Hann sagðist ekki búast við að geta byrjað neitt á þessu fyrr en um miðjan apríl, en það er alla vega eitthvað farið í gang.

Mæliblöðin komin!

Mæliblöðin komu loksins í vikunni! Mikið var ég glöð. Byggingarreiturinn okkar er 16,5 m x 17,5 m og er það akkúrat eins og ég var að vonast eftir. Núna er bara að hitta arkitektinn í vikunni og fá hann til að byrja vinnuna. Ég skelli hérna inn grunnmynd af efri hæðinni. Hugmynd sem ég er búin að vera með í kollinum í svolítinn tíma.