Staðan í dag

Við fórum og kíktum uppeftir áðan. Það er búið að tengja alla ofna, búið að múra/steypa uppí öll göt eftir fræsun og búið að sópa og hreinsa. Við búumst þá við að það verði flotað á morgun. Hérna eru myndir sem ég tók áðan, svo sem ekki mikið að sjá öðruvísi, nema það er komin tengistokkurinn og hérna eru þá myndir af þeim herbergjum sem einhverra hluta vegna tókust ekki í fyrstu atrennu.

Við kíktum líka í Álfaborg og skoðuðum flísar. Við erum búin að vera að velta fyrir okkur hvort það verði erfitt að finna flísar sem passa við dökku innréttinguna sem við erum búin að vera að hugsa mest um. En við fundum flísar sem okkur líst vel á. Þær koma líka í nokkrum litatónum og nokkrum stærðum, svo þær henta vel á gólf og veggi og á eldhús, forstofu og gestabað, eins og hugsunin hjá okkur var, að láta þær flæða á milli. Við fengum prufur af nokkrum og ætlum að fara á morgun í IKEA að máta þær við innréttinguna. Við fórum líka að skoða klósett, vaska, blöndunartæki, baðinnréttingar ofl. hjá Kjartani (manni Birnu sem vinnur með mér) og okkur leist ágætlega á, ætlum að kanna verðið og sjá hvort við viljum taka það. Annars fáum við sjálfsagt líka einhvern afslátt í Baðheimum, þurfum að fara þangað líka að skoða.

Jæja, hérna koma myndirnar:

Þetta eru tengi"græjurnar" í bílskúrnum, þ.e. inntökin oþh.

ofnarnir í bílskúrnum. Innri ofninn á að vera í geymslunni sem er innaf bílskúrnum.

Stofuglugginn og hurðin útí bakgarð

"Borðkrókurinn" og stofan. Þ.e. þarna kemur tungan á eldhúsinnréttingunni sem skilur að stofu og eldhús.

Eitt barnaherbergið uppi sem varð útundan í myndatöku síðast. Það er við hliðina á baðherberginu, enda sjást þarna rörin uppúr gólfinu sem eru fyrir sturtuna.

Tengistokkurinn í þvottahúsinu og þar fyrir aftan er hjónaherbergið.

Hjónaherbergið. Litli glugginn og ofninn sem rétt sést í þarna lengst til hægri eru inni í fataherberginu.

Þarna er baðherbergið og síðasta barnaherbergið, það stærsta.

Rikki á leiðinni niður aftur.

Heimilistæki

Jæja, þá eru heimilistækin í höfn. Eigum reyndar eftir að fara í Húsasmiðjuna og ganga frá greiðslu. Við ákváðum að taka tilboði frá þeim sem var með keimlíkum vörum og í tilboðinu frá Rafha, nema það var með ódýrari ofni. Heildarverðið var þó um 50 þús lægra. Við tókum s.s. amerískan ísskáp, bakaraofn, keramík helluborð, hálf-innbyggða uppþvottavél (þ.e. stjórnborðið sést) og barkalausan þurrkara. Okkur leist ekki nógu vel á háfa hjá Húsasm. svo við ákváðum að bíða með það og kannski taka háf annars staðar eða alla vega skoða það mál betur. Fyrir þessi herlegheit borgum við svo um 615.000.-! Þá er bara að borga og brosa.

Meira að gerast

Nú er rafmagn komið inní hús og í gang. Kíktum í gær og það er búið að fræsa úr gólfum að hluta fyrir ofnalögnunum. Þetta er allt á réttri leið.

Í gær kíktum við líka í IKEA og hittum þar Guðbjörgu og spjölluðum aðeins við hana og annan starfsmann. Við ætlum að fara í að fá þau til að teikna upp fyrir okkur eldhúsið og koma með hugmyndir. Við Rikki vorum sammála um að okkur finnst NEXUS svarbrúna innréttingin svolítið flott, en vorum að spá hvort hún væri of dökk. Okkur líst líka vel á birki innréttinguna, en hún á það víst til að gulna svolítið, svo hún endist kannski ekki eins vel. Kemur allt í ljós.
Svo er ég búin að vera að fá tilboð frá ýmsum fyrirtækjum í heimilistæki og tilboðið sem heillar mig mest eins og er er frá Rafha. Ætlum að kíkja þangað um helgina.

Kveðja frá húsbyggjaranum!

Allt að komast í gang

Í gær fengum við lyklana að húsinu. Við fórum svo í gærkvöldi að skoða. Það er búið að hengja upp ofnana, en þeir eru enn ótengdir. Svo þurfum við bara að fara að byrja á okkar hluta. Fyrst liggur fyrir að einangra loftið. Við þurfum samt líklega að bíða þangað til ofnarnir eru alveg komnir upp og búið að flota gólfin. Það verður kannski ekki fyrr en í næstu viku eða þarnæstu. En við ætlum líka að reyna að koma gestaklósettinu upp. Mig langar að koma upp þessum tveimur litlu veggjum sem við þurfum að setja á neðri hæðina, til að hægt sé að spartla þar og halda áfram, koma upp eldhúsi oþh. Hérna koma myndir teknar í gær. Einhverra hluta vegna myndaðist ekki hjónaherbergið og eitt barnaherbergið, en hér er alla vega restin.

Framkvæmdir að hefjast

Rikki var í sambandi við Árna, verktakann, í morgun. Hann er búinn að koma píparanum í gang að koma ofnunum upp. Rikki ætlar að hitta þá á morgun til að koma á hreint hvar við viljum hafa ofna. Svo förum við til Montreal og verðum að salta meiri aðgerðir hjá okkur fram yfir helgi.

Myndir

Nýtt að gerast

Jæja, þá erum við komin vel á veg með annað hús. Lóðinni að Döllugötu var skilað í vor og við tóku sumarfrí og pælingar. Eftir sumarfrí fórum við aftur á fullt að leita okkur að húsi og fundum þetta líka fína raðhús á Völlunum. Það er á Klukkuvöllum 44 og er um 220 fm að stærð (með bílskúr). Það eru 4 svefnherbergi, baðherbergi, þvottahús og sjónvarpshol á efri hæðinni en á neðri er bílskúrinn, eldhús, stofa, gestaklósett og forstofa. Við erum mjög ánægð með skipulagið, sérstaklega stærðina á barnaherbergjunum, þau eru frá 11,1 fm uppí rúmlega 13 fm. Eini ókosturinn er að það er ekki innangengt milli bílskúrs og íbúðar. En við lifum það nú af.
Tilboði sem við gerðum í húsið var tekið, öll lán eru komin í gegn, en nú á bara eftir að skrifa undir kaupsamning. Nú erum við bara á fullu að undirbúa okkur við að hefja framkvæmdir. Ójá, húsið skilast rúmlega fokhelt. Það er einingahús, svo að allir útveggir eru einangraðir, allar tengingar eru komnar inn í hús, þ.e. rafmagn, vatn oþh. Ofnar verða uppsettir og hiti kominn inn og gólf verða flotuð og tilbúin undir gólfefni. Að utan er húsið alveg tilbúið með salla, að aftan er lóð grófjöfnuð en að framan er búið að helluleggja bílastæði með hitalögn (ótengd) og smá grasflöt og sorptunnuskýli komið.
Það fyrsta sem liggur fyrir okkur er að einangra loftið á efri hæð. Svo að sandspartla útveggi. Setja upp inni veggi og spartla og svo innréttingar, tæki, hurðir og gólf. Allt þetta þurfum við að klára á 3 mánuðum, ja eða meira að segja innan við það. Því við þurfum að afhenda okkar íbúð 15. desember!
Ég ætla að ná í myndir af Moggavef og pósta hér inn. Svo þarf ég nú að taka myndir sjálf að innan til að sýna hvernig þetta gengur hjá okkur.
Kveðja að sinni.